ಕೇಂದ್ರಾಡಳಿತ ಪ್ರದೇಶವಾಗಿದ್ದ ಗೋವಾ ರಾಜ್ಯ 15 ಲಕ್ಷ ಜನಸಂಖ್ಯೆಗೆ ಎರಡು ಲೋಕಸಭೆ ಹಾಗೂ 40 ವಿಧಾನಸಭಾ ಸ್ಥಾನವನ್ನು ಹೊಂದಿದೆ. ಆದರೆ ಪ್ರತ್ಯೇಕ ರಾಜ್ಯವಾಗಿದ್ದ ಕೊಡಗು ಒಂದು ಲೋಕಸಭೆ ಸ್ಥಾನವನ್ನು ಹೊಂದಿಲ್ಲ. ಕೇವಲ ಎರಡು ವಿಧಾನಸಭಾ ಕ್ಷೇತ್ರವನ್ನು ಹೊಂದಿದ್ದು ಕೊಡಗಿಗೆ ಸೂಕ್ತ ರಾಜಕೀಯ ಪ್ರಾತಿನಿದ್ಯ ಸಿಗದೇ ಅವಕಾಶ ವಂಚಿತವಾಗಿದೆ ಎಂದು ರಾಜ್ಯ ವನ್ಯಜೀವಿ ಮಂಡಳಿ ಸದಸ್ಯ ಮೇರಿಯಂಡ ಸಂಕೇತ್ ಪೂವಯ್ಯ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು.
ಟಿ. ಶೆಟ್ಟಿಗೇರಿ ತಾವಳಗೇರಿ ಮೂಂದ್ ನಾಡ್ ಕೊಡವ ಸಮಾಜ ಆಶ್ರಯದಲ್ಲಿ , ಚಂಗ್ರಾಂದಿ ಪತ್ತಲೋದಿ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಅವರು ಮಾತನಾಡಿದರು.
ಗೋವಾ ರಾಜ್ಯದಲ್ಲಿ ತಲಾ 35 ಸಾವಿರ ಜನಸಂಖ್ಯೆಗೆ ಒಂದು ವಿಧಾನಸಭಾ ಸ್ಥಾನವನ್ನು ನೀಡಲಾಗಿದೆ. ಆದರೆ ಕೊಡಗಿನಲ್ಲಿ 6 ಲಕ್ಷ ಜನಸಂಖ್ಯೆಗೆ ಕೇವಲ ಎರಡು ವಿಧಾನಸಭಾ ಸ್ಥಾನವನ್ನು ನೀಡಲಾಗಿದೆ.ಒಂದು ಲೋಕಸಭಾ ಸ್ಥಾನವು ಇಲ್ಲದಾಗಿದೆ. ಗೋವಾ ರಾಜ್ಯದಂತೆ ಕೊಡಗನ್ನು ಪರಿಗಣಿಸಬೇಕು. ಕೊಡಗಿಗೆ ಸೂಕ್ತ ಲೋಕಸಭೆ ಹಾಗೂ ವಿಧಾನಸಭೆಯನ್ನು ನೀಡಿದರೆ ಕೊಡಗಿನ ಅಭಿವೃದ್ಧಿ ಹೆಚ್ಚಿನ ಅನುಕೂಲವಾಗಲಿದೆ ಎಂದು ಪ್ರತಿಪಾದಿಸಿದರು .
ಕೊಡಗು ಜಿಲ್ಲೆಯನ್ನು ಎಲ್ಲಾ ರಾಜಕೀಯ ಪಕ್ಷಗಳು ಸೂಕ್ತ ರಾಜಕೀಯ ಪ್ರಾತಿನಿದ್ಯ ನೀಡದೆ ನಿರ್ಲಕ್ಷ್ಯ ಮಾಡಿದೆ.ಫೀಲ್ಡ್ ಮಾರ್ಷಲ್ ಕಾರ್ಯಪ್ಪ ಅವರು ಮುಂಬೈ ಪಶ್ಚಿಮ ಕ್ಷೇತ್ರದಲ್ಲಿ 1971 ರಲ್ಲಿ ಸ್ವತಂತ್ರವಾಗಿ ಲೋಕಸಭೆ ಚುನಾವಣೆಗೆ ನಿಂತು 90 ಸಾವಿರ ಮತ ಪಡೆದ ಸೋತರು. ಹಾಗೆಯೇ ಎಂ.ಸಿ. ನಾಣಯ್ಯ ಅವರು ಉತ್ತಮ ಆಡಳಿತಗಾರನಾಗಿ ದ್ದರೂ ಅವರು ಮುಖ್ಯಮಂತ್ರಿ ಆಗಲಿಲ್ಲ. ಎ. ಕೆ. ಸುಬ್ಬಯ್ಯ ಅವರು ಅತ್ಯಂತ ಕಾನೂನು ಪರಿಣತಿ ಹಾಗೂ ಸಂವಿಧಾನ ಅರಿವು ಇರುವ ನಾಯಕರಾಗಿದ್ದರೂ ಅವರು ಸಹ ಪ್ರಧಾನ ಮಂತ್ರಿ ಸ್ಥಾನಕ್ಕೆ ಅರ್ಹರಾಗಿದ್ದರೂ ಆ ಸ್ಥಾನ ಸಿಗಲಿಲ್ಲ. ಹಾಗೆಯೇ ಐದು ಬಾರಿ ಗೆಲುವು ಸಾಧಿಸಿದ ಅಪ್ಪಚ್ಚು ರಂಜನ್ ಅವರಿಗೆ ಕಾಟಾಚಾರದ ಆರು ತಿಂಗಳ ಸಚಿವ ಸ್ಥಾನವನ್ನು ನೀಡಲಾಯಿತು. ಹಾಲಿ ಶಾಸಕ ಎ. ಎಸ್.ಪೊನ್ನಣ್ಣ ಅವರಿಗೆ ಅತ್ಯಂತ ಹೆಚ್ಚು ಅರ್ಹತೆ ಇದ್ದರೂ ಸಚಿವ ಸ್ಥಾನ ನೀಡಲಿಲ್ಲ. ಹೀಗೆ ರಾಜಕೀಯ ಪ್ರಾತಿನಿದ್ಯ ಇಲ್ಲದೆ ಅರ್ಹತೆ ಇದ್ದರೂ ಅವಕಾಶ ವಂಚಿತರಾಗಿದ್ದಾರೆ
ಎಂದು ಅವರು ವಿಷಾದ ವ್ಯಕ್ತಪಡಿಸಿದರು.
ಫಿ. ಮಾ.ಕಾರ್ಯಪ್ಪ, ಎಂ. ಸಿ. ನಾಣಯ್ಯ, ಎ.ಕೆ. ಸುಬ್ಬಯ್ಯ, ಅಪ್ಪಚ್ಚು ರಂಜನ್ ಅವರುಗಳಿಗೆ ರಾಜ್ಯಸಭಾ ಸದಸ್ಯರಾಗಿ ಆಯ್ಕೆಯಾಗಲು ಎಲ್ಲಾ ಅರ್ಹತೆ ಹೊಂದಿದ್ದರೂ ಅವರನ್ನು ನಿರ್ಲಕ್ಷಿಸಲಾಯಿತು ಎಂದು ವಿಮರ್ಶೆ ಮಾಡಿದರು.
ಕೇವಲ ಜಾತಿ ಆಧಾರದಲ್ಲಿ ರಾಜ್ಯಸಭೆಗೆ ಆಯ್ಕೆ ಮಾಡಲಾಗುತ್ತಿದೆ. ಇಲ್ಲಿ ಅರ್ಹತೆ ಮುಖ್ಯವಾಗುವುದ್ದಿಲ್ಲ
ಹಾಗೆಯೇ ಲೋಕಸಭೆಗೂ ಜಾತಿ ಆಧಾರದಲ್ಲಿ ಟಿಕೆಟ್ ಹಂಚಿಕೆಯಾಗುತ್ತಿದೆ. ಅತ್ಯಂತ ಸೂಕ್ಷ್ಮ ಹಾಗೂ ಅಲ್ಪಸಂಖ್ಯಾತ ಕೊಡವ ಜನಾಂಗ ನಾಯಕರಿಗೆ ಅರ್ಹತೆ ಇದ್ದರೂ ಜಾತಿ ರಾಜಕಾರಣದ ಲಾಭಿ ಇಲ್ಲದೆ ರಾಜಕೀಯವಾಗಿ ಸೂಕ್ತ ಸ್ಥಾನಮಾನ ಸಿಗುತ್ತಿಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.
ಕೊಡವರಿಗೆ ರಾಜ್ಯಸಭೆಗೆ ಆಯ್ಕೆ ಮಾಡುವ ಅವಕಾಶ ನೀಡಬೇಕು ಎಂದು ಒತ್ತಿ ಹೇಳಿದ ಅವರು ಸುಧೀರ್ಘವಾಗಿ ಮಾತನಾಡಿದ ಸಂಕೇತ್ ಪೂವಯ್ಯ ಕೊಡವ ಜನಾಂಗವನ್ನು ಆರ್ಥಿಕ, ಸಾಮಾಜಿಕ ಹಾಗೂ ಶೈಕ್ಷಣಿಕವಾಗಿ ಮುಂದುವರಿದ ಜನಾಂಗ ಎಂಬ ಭಾವನೆಯನ್ನು ಸೃಷ್ಟಿ ಮಾಡಲಾಗಿದೆ. ಆದರೆ ಜನಾಂಗ ತುಂಬಾ ಹಿಂದುಳಿದಿದೆ. ಶೈಕ್ಷಣಿಕವಾಗಿ ಪ್ರಗತಿ ಸಾಧಿಸಿದ್ದರೂ ಸಹ ಮೀಸಲಾತಿ ಇಲ್ಲದೆ ಹಾಗೂ ಜಾತಿ ರಾಜಕಾರಣದ ಪ್ರಭಾವ ಇಲ್ಲದೆ ಸರಕಾರಿ ಉದ್ಯೋಗ ಸಿಗದೇ ಉನ್ನತ ಸ್ಥಾನಮಾನಕ್ಕೆ ಹೋಗಲಾಗುತ್ತಿಲ್ಲ. ಕೊಡವರು ತಮ್ಮ ಸ್ವಂತ ಪ್ರತಿಭೆ ಹೊಂದಿದ್ದರೂ ಅವಕಾಶ ವಂಚಿತರಾಗಿದ್ದಾರೆ. ಚೆನ್ನಾಗಿ ಹಾಕಿ ಆಡುವವರು ಕೊಡಗಿನಲ್ಲಿಯೇ ಉಳಿದಿದ್ದಾರೆ, ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗುತ್ತಿಲ್ಲ ಎಂದು ವಿಷಾದ ವ್ಯಕ್ತಪಡಿಸಿದರು.
ನಮ್ಮ ಆಚಾರ ವಿಚಾರ ಸಂಸ್ಕೃತಿಯನ್ನು ಟಿ. ಶೆಟ್ಟಿಗೇರಿ ಕೊಡವ ಸಮಾಜ ಕಳೆದ 8 ವರ್ಷಗಳಿಂದ ಪತ್ತಾಲೋದಿ ಕಾರ್ಯಕ್ರಮದ ಮೂಲಕ ಆಚರಿಸುತ್ತ ಪ್ರತಿಭೆಗಳಿಗೆ ವೇದಿಕೆ ನೀಡುತ್ತಾ ಬಂದಿದೆ. ಇದು ಎಲ್ಲಾ ಕೊಡವ ಸಮಾಜಗಳಿಗೆ ಮಾರ್ಗಸೂಚಿಯಾಗಬೇಕು. ಸಣ್ಣ ವಯಸ್ಸಿನಲ್ಲಿಯೇ ಮಕ್ಕಳಿಗೆ ವೇದಿಕೆ ನೀಡಿದರೆ ಅವರು ಅಭ್ಯಾಸದಿಂದ ವೇದಿಕೆಯ ಭಯ ಬಿಟ್ಟು ಜನಾಂಗದ ಆಚಾರ ವಿಚಾರ ಕಲಿಕೆಯಲ್ಲಿ ತೊಡಗಿಸಿಕೊಂಡಾಗ ಅಭಿಮಾನ ಮೂಡುತ್ತದೆ. ಪಾರ್ಸಿ ಜನಾಂಗಕ್ಕೆ ನೀಡಿರುವಂತ ವಿಶೇಷವಾದ “ಜಿಯೊ ಪಾರ್ಸಿ” ಮಾದರಿ ಕೊಡವರ ಅಭಿವೃದ್ಧಿಗೆ ಸರಕಾರ ಯೋಜನೆ ಜಾರಿಗೆ ತರಬೇಕು.ಕೊಡವ ಜನಾಂಗದಲ್ಲಿ ಬ್ಯಾಂಕಿಂಗ್ ವ್ಯವಸ್ಥೆಯನ್ನು ಸ್ಥಾಪನೆ ಮಾಡಿ ಜನಾಂಗದ ಅಭಿವೃದ್ಧಿಗೆ ನೆರವಾಗುವಂತೆ ರೂಪಿಸಬೇಕು ಎಂದು ಕರೆ ನೀಡಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಟಿ. ಶೆಟ್ಟಿಗೇರಿ ಕೊಡವ ಸಮಾಜದ ಅಧ್ಯಕ್ಷ ಕೈಬುಲಿರ ಹರೀಶ್ ಅಪ್ಪಯ್ಯ ಅವರು ಕೊಡವ ಜನಾಂಗದಲ್ಲಿ ಜನಸಂಖ್ಯೆ ಹೆಚ್ಚಾಗಬೇಕು.ಇದರ ಬಗ್ಗೆ ಜನಾಂಗದಲ್ಲಿ ಗಂಭೀರವಾದ ಚಿಂತನೆ ಹಾಗೂ ಪೂರಕವಾದ ಯೋಜನೆಗಳನ್ನು ರೂಪಿಸಬೇಕಾಗಿದೆ ಎಂದರು.
ಈ ನಿಟ್ಟಿನಲ್ಲಿ ಟಿ-ಶೆಟ್ಟಿಗೇರಿ ಕೊಡವ ಸಮಾಜ ಸಹ ನಿರ್ಣಯವನ್ನು ಜಾರಿಗೆ ತರಲಿದೆ ಅದನ್ನು ಈ ಪತ್ತಾಲೋದಿ ಕಾರ್ಯಕ್ರಮದ ಅಂತಿಮ ದಿನದಂದು ಘೋಷಣೆ ಮಾಡಲಾಗುವುದು ಎಂದು ಹೇಳಿದರು.
ಬೊಳ್ಳಾಜಿರ ಸುಶೀಲಾ ಅಶೋಕ್ ಅವರು ಮಾತನಾಡಿ ಈ ಕಾರ್ಯಕ್ರಮ ಸೂರ್ಯ ಚಂದ್ರ ಇರುವರೆಗೆ ನಡೆಯಲಿ ಎಂದು ಹಾರೈಸಿದರು.
ಸಾಂಸ್ಕೃತಿಕ ಕಾರ್ಯಕ್ರಮ :ಈ ಸಂದರ್ಭ ಬಿರುನಾಣಿ ಮರೆನಾಡ್ ಕೊಡವ ಸಮಾಜ ಹಾಗೂ ಬಿರುನಾಣಿ ಯ ಲಯನ್ಸ್ ಶಾಲೆಯ ವಿದ್ಯಾರ್ಥಿಗಳಿಂದ ವಿವಿಧ ಕೊಡವ ಸಾಂಸ್ಕೃತಿಕ ಕಾರ್ಯಕ್ರಮ ಗಮನ ಸೆಳೆಯಿತು.
ವೇದಿಕೆಯಲ್ಲಿ ಮರೆನಾಡ್ ಕೊಡವ ಸಮಾಜ ನಿರ್ದೇಶಕಿ, ಬುಟ್ಟಿಯಂಡ ಸುನಿತ ಗಪ್ಪಣ್ಣ, ಬಾಳೆಯಡ ಅಶೋಕ್, ಮೀರಾ ಅಶೋಕ್, ಕರ್ನಂಡ ರೂಪ ಹಾಜರಿದ್ದರು.
ಕೊಡವ ಸಮಾಜದ ಉಪಾಧ್ಯಕ್ಷ ಮಚ್ಚಮಾಡ ಸುಮಂತ್, ಖಜಾಂಚಿ ಚಂಗುಲಂಡ ಸತೀಶ್, ನಿರ್ದೇಶಕರುಗಳಾದ ಮುಕ್ಕಾಟಿರ ಸಂದೀಪ್, ಚಂಗುಲಂಡ ಅಶ್ವಿನಿ ಸತೀಶ್ ಕಾರ್ಯಕ್ರಮ ನಿರ್ವಹಿಸಿದರು.
ಅಜ್ಜಮಾಡ ರ ಸಾವಿತ್ರಿ ಪ್ರಾರ್ಥಿಸಿ, ಕೋಟ್ರಮಾಡ ಸುಮಂತ್ ಸ್ವಾಗತಿಸಿ, ಬಾದುಮಂಡ ವಿಷ್ಣು ಕಾರ್ಯಪ್ಪ ವಂದಿಸಿದರು.